قصة سهام الجزء الاول

يتم علي خير تبقي ترجعي تخرجي زي الاول .. وان كان علي طلبات البيت فانا موجود اسبوع اهو مش ورايا حاجة هبقي انزل انا اشتري كل حاجة
طبعا مكنش قدامي غير اني اسمع كلامة وهي فرصة ارتاح شوية من شراء الطلبات والوقوف في الفرن
وفعلا مرت الايام واخويا هو اللي كان بيشتري كل طلبات البيت ومخرجتش طول الأسبوع ده نهائي
وفي اليوم السابع اللي كان اخويا حسن محدد فيه يسمع رأيي في جوازي من سيد
صحيت الصبح زي كل يوم. عملت له الفطار وبعدها سألني عن رأيي
وهزيت دماغي اني موافقة وامي كانت قاعدة جنبي راحت قامت باستني وخدتني في حضنها وقالتلي مبروك يا بنتي وعقبال ما اشوفك في بيتك سعيدة ومتهنية
اخويا قال ل ماما طب انا هخرج وهخليه يحدد ميعاد ويجي يطلبها رسمي مني هنا
حسن خرج وفضل طول النهار برة ومرجعش غير بعد العشا
جهزت انا العشا وماما كانت جت ودخلت نامت ساعتين لغاية ما اخويا جه وصحاها علشان تتعشي معانا
واحنا بنتعشي اخويا طلع فلوس من جيبة وادهالي وقالي تروحي بكرة تشتري جلبية بيتي حلوة وطرحة وشبشب جديد علشان سيد هيجي بعد يومين علشان يطلب ايدك مني
قومت وبوست ايد اخويا وايد امي وجريت علي اوضتي وانا فرحانة وشلت الفلوس تحت مخدتي
وبعدين خرجت عملت الشاي ل ماما و ل حسن اخويا
وبعدين دخلت الأوضة بتاعي وانا طايرة من الفرحة
اخيرآ هتجوز زي كل البنات وهيبقي ليا بيت لوحدي وراجل يحبني واحبة
تاني يوم بعد ما صحيت وفطرت اخويا وماما نزلت الشغل بتاعها لبست عبايتي وروحت محل بتاع جلاليب حريمي واشتريت جلبية حلوة تليق بالمناسبة دي وبعدين اشتريت طرحة وشبشب وعديت علي ماما وفرجتها علي اللي اشترتهم وماما قالتلي ربنا يتمملك بخير ومبروكين عليكي وبعدها روحت البيت وانا في قمة السعادة
عدو اليومين بسرعة وصحيت في اليوم اللي هتخطب فيه. لقيت ماما في المطبخ بتعمل اكل ومشغلة اغاني افراح
دخلت المطبخ بوست ماما وجيت اعمل معاها الاكل ماما رفضت. قالتلي انتي النهاردة مش هتعملي حاجة غير تذوقي نفسك علشان لما يجي عريسك تكوني قمر
الي اللقاء في الجزء الثان