اغرب من الخيال

مع الشيخ حسن إللي أهله سابوه يقعد مع سمر قبل كتب الكتاب. 
لما الشيخ حس برد فعل سمر .. إتفاجيء هو كمان وقالها 
_ أنا كنت فاكر إنهم حكولك على ظروفي وإني كفيف وكدا .. لكن إظاهر إني طلعت غلطان .. بصي يا سمر.. إحنا لسه على البر .. وكويس إننا مكتبناش الكتاب .. لو مش موافقة قوليلي وإمشي وأنا هبلغهم رغبتك بدوري .. وصدقيني مافيش إحراج ولا زعل والأهم ماحدش هنا هايغصبك على حاجة .
حست سمر إن الشيخ حسن راجل مهذب ومحترم وإبن حلال رغم ظروفه .. ردت عليه سمر وقالتله 
_ مافيش مانع .. أنا موافقة أتجوز منك .. بس بشرط .. ماسيبش شغلي .. لإني معتمده عليه والراتب كويس جدا والمنصب كمان .
وبالفعل وافق على الشرط وإتجوزوا وقعدت معاه وبدأت ترعاه وتستحمله في عجزه والحياة كانت ماشية مافيش أي مشكلة .
بس بعد كام شهر بدأت المشاكل .. كان الواضح إن في قاعدة كبيرة من العيلة مكنوش موافقين على سمر .. مكنوش موافقين على الجوازة من بدايتها .. لكن الشيخ حسن كان مصر ووقف قصادهم .
ولما زادت المشاكل ووصل إنه خسر أهله بسبب سمر سابهم وعاش بعيد عنهم في شقة إختارتها سمر بنفسها .
ورجعت الأمور تستقر مرة تانية .. لحد ما ظهرت مشكلة جديدة .. إنهم مابيخلفوش .. عدى كام سنة ومافيش أي فايدة.
كل مايروحوا لدكتور يقولهم مافيش موانع للحمل خالص .. هي سليمة وهو سليم .
الشيخ حسن شك فيها وكان بيحسبها بتاخد موانع للحمل .. لكنها أقسمت إنها مبتاخدش أي حاجة .
ولما راحوا لأخر دكتور أكدله كلام سمر وقاله إنها مش بتاخد أي موانع للحمل .. وإن بإذن الله الحمل هيحصل بس هياخد وقت شوية .
من النحية التانية أهله كانوا غضبانين جدا منه .. ودا لإن الشيخ حسن مشي من بيت العيلة من غير مايقول لحد منهم .. بمعنى أصح هرب هو سمر .
كتر الكلام بينهم إن سمر وافقت على الجوازة دي بسبب فلوس الشيخ وإنها إستغلت طيبته علشان تسرقه .. وبكرة تخلف منه ولد يورث أبوه وكل حاجة ليه .
وبدأوا يدوروا عليه في كل مكان .. العيلة دي محدش في البلد كان بيطيقهم .. مش علشان هما أغنى عيلة في البلد وكدا لأ .. لإنهم متكبرين .. وشايفين نفسهم إن ماحدش زايهم خالص .
وأهم شيء عندهم الفلوس وبس .. علشان كدا كانوا هايتجننوا ويعرفوا الشيح حسن وسمر ساكنين فين .. أنا كنت بعرف أخبار سمر أول بأول .. كنت بتصل بيها دايما .. بس مكنتش معرفه حد ولا حتى جوزي .
وكانت سمر بتحكيلي على كل حاجة .. وكنت بلاحظ مؤخرا إن شخصيتها بتتغير .. بقيت أسمع
صوتها بقى عالي .. وصوت ضحكتها يجيب لأخر الشارع .. ولما بسألها إنتي فين .. كانت تقولي إنها في الشغل .
وبقت سمر شخصية تانية خالص غير إللي كنت أعرفها .. بقت تشتكي من الشيخ حسن وإنه بقى عبء عليها .. وإنها مش قادرة توفق بين البيت والشغل .
وقتها قولتلها  
_ لا يا سمر .. اوعي تتخلي عن شخصيتك وتتحولي لبني ادمة تانية .. راعي ربنا في جوزك وبيتك .
وفضلت وراها لحد ما بفضل الله اقتنعت بكلامي..
لكن في فترة إتقطعت أخبارها خالص .. وتليفونها دايما مقفول .. وبعد مدة عرفت إنها وجوزها رجعوا البلد مرة تانية .. سمر حملت وخلفت بنت بعد ما عدى على جوازها ٥ سنين .
يتبع
بقلم محمد إبراهيم عبد العظيم