فلك

ايه لو هي قامت ..
لحد ما الحرارة هديت شوية بعد ما قاستها انصاف اطمنت وهي بتشيل طبق الكمادات 
_ خلاص يا فلك السخونية هديت وانا كلمت دكتوره عشان يجي ويكتبله علاج يخف اسرع 
_ بس هو ليه مش بيكلمني ياعمتو أنا عمالة اكلمه وهو بيفتح عينه بس وينام تاني.
_ الحرارة مهمداه يابت هيبقي حصان دلوقتي لما ياخد العلاج واعمله شوربة تقويه ..
وخليكي انتي .. كل ساعة قيس له الحرارة أنا علمتك ازاي لحد ما الدكتور يجي .. وانا هقوم اعمله الشوربة .
وفعلا خف وبقا كويس لما الدكتور كشف عليه واداله علاج ومقويات وانصاف قعدت ايام تأكله شوربة وتشربه عصاير باردة طبيعية من غير سكر تعوضه .. 
مسحت دموعها وقامت بسرعة علي المطبخ لما افتكرت هي هتعمل ايه عمتها علمتها تتصرف ازاي وهي اتعاملت مع مرضه قبل كدا ومن خۏفها نسيت تماما ويمكن هي عرفت أهمية انصاف دلوقتي
دخلت الاوضة بعد ما عملت مية باردة وفتحت الشنطه اللي بياخدها معاه المستشفي وطلعت جهاز قياس الحرارة وخرجتله وقعدت جنبه علي الارض تاني وقاستله الحرارة وطلعت عالية فعلا 
اتوترت وخدت نفس وحاولت تكون هادية 
وفضلت طول الفجر لحد ظهور النهار تعمله في كمادات وتكلمه عشان يفوقلها ولما الحرارة هديت 
لبست ونزلت أقرب صيدلية لبيتهم قاصدة عم جميل دكتور صيدلي بسيط ليه مواقف كويسة معاهم وعارفهم قالتله وطلع معاها علي فوق وساعدها أنهم يدخلوه ينام في السرير بدل نومة الكنبة 
وكشف عليه وآداله حقنة تخفف الحرارة 
وفلك دخلت المطبخ فتحت فيديو علي موبايلها تتعلم تعمل شوربة خضار وفضلت حريصة اوي أنها متبوظهاش هو مش ناقص العك بتاعها دلوقتي !.
ولما خلصتها دخلت ل فارس وبقت تحاول بمساعدة دكتور جميل يأكلهاله وكل كمية بسيطة ورجع نام تاني واللي كلامه كان ضئيل اوي بس حاسس بيها واللي بيحصل بس معندوش قدرة يتكلم .. 
حطت قدام دكتور جميل ضيافة تقديرا لوقوفه جمبها لحد ما الليل دخل عليهم معتبرهم زي اولاده ومقدر أن فلك لوحدها وممكن يتعب تاني فضل معاها لحد ما اطمن أنه تتحسن نسبيا 
_ بس تعرفي يا فلك مكنتش اعرف انك شاطرة وهتتعاملي بسرعة كدا .
ابتسمت 
_ عم جميل انت متعرفش حالتي أنا فضلت ربع ساعة اعيط جنبه وانا معرفش اعمل ايه أنا لما بتوتر دماغي بتقف بس ربنا الهمني .
_ أنت عملتي خير يابنتي والحمدلله بقا كويس
وبكرة
يصحي يبقي زي فل مضطر اقوم أنا بقا
ومش هقولك اي حاجه تكلميني علي طول
وهو بقا كويس الحمدلله.
ابتسمتله ب امتنان 
_ مش عارفة اقولك ايه ولله ياعم جميل 
حقيقي انت وجودك ك اب معانا ومطمنتش لحد يساعدني زيك.
_ أنا معملتش حاجه يابنتي انتوا زي ولادي
بس حاولي تخشي تريحي شوية جمب جوزك
انتي تقريبا بقالك يومين منمتيش.
_ هنام يا عم جميل بس لما اطمن انه صحي