القصر الحلقة الثانية

القصر
الحلقة_الثانية
احنا هندخل القصر دا من جوا وهنقضي الليلة جواه كمان 
ومين قالك بقى اننا هنوافق على الكلام ده
دا مش كلام دا رهان واللي هيرفض يبقى خسر الرهان 
قصر مهجور بقاله 200 سنة و الحكايات اللي بتتحكي عنه تشيب واتخن واحد في البلد كلها ېخاف بس يهوب من قدامه بالليل عايزنا أنت بجلالة قدرك ندخله ونبيت فيه كمان باينك اتهبلت يا ابن سواق القطر انت 
لا وعلى ايه نشوف حاجة تانية نتراهن عليها حاجة تكون على قدكم ايه رأيكم نلعب الشايب وللا نلعب الأوله احسن 
انت بتتمهزأ بينا يا عمر وللا شايفنا عيال قدامك 

ايوه يا حسني شايفكم عيال وجبنا كمان زي ما هتدخلوا القصر ده انا هدخل معاكم وهنثبت للبلد كلها ان مفيش عفريت الا بني آدم وأن احنا ارجل واشجع من رجالة البلد دي كلها ..
لا يا حبيبي يفتح الله مش لاعبين وأن كنت بتعمل دا كله عشان متنضربش خلاص متخافش مش هنضربك بس انت متبقاش تطول لسانك تاني بعد كدا .. بينا يا عيال 
استنى يا ولا انت وهو احنا هندخل القصر دا وهنبيت فيه كمان واني عن نفسي مبخافش من حاجة وقلبي ده مېت وشبعان مۏت 
حلاوتك يا خالد يا ابن عمدتنا والنبي الحاج شديد جاب راجل ها يا رجالة حد تاني قال جاي 
كلنا جايين يا حبيبي انتو فاكرين انتو بس اللي رجالة وللا إيه 
طب يالا بينا الساعة دلوقتي 10 30 هنقضي الكام ساعة اللي باقيين من الليل جوا ونشوف هيحصل ايه ..
نشوف
ودخلنا القصر ..
نطينا السور وهو عامة كان واطي متر ونص تقريبا شبكنا لبعض ونطينا جوا و عدينا الجنينة الكبيرة اللي قدامه الفسقية وشجرة النبق الكبيرة اللي بتظهر في وسط جنينة القصر بالليل كإنها مارد عملاق الجنينة اتغطت كلها بالحشېشة وشوفنا الكرسي اللي كان بيقعد عليه رشيد باشا في جنينة القصر كرسي معمول على نفس طراز كرسي السلطان انا مش عارف ازاي الدولة محطتش ايدها على القصر دا من زمان وحولته لمتحف وللا حاجة زي كدا ..
العيال كانوا خايفين انا عارف انهم مدخلوش القصر بمزاجهم الغرور هو اللي جاب رجليهم في الخية اللي هتجيب أجلهم نفس الغرور اللي قتل المتنبي لما طلع عليه قطاع طرق وهرب منهم وبعدين قابل راجل في الطريق قاله مش انت المتنبي بتاع الخيل والليل والبيداء تعرفني وبتهرب من قطاع طرق يا خيبتك التقيلة قام الغرور ركبه ورجعلهم تاني راحوا مخلصين عليه ..
كلهم كانوا ميتين من الخۏف بس فيهم اللي عارف يتحكم في أعصابه ويخبي خوفه زي خالد ابن الحاج شديد العمدة وفيهم اللي متوتر وساكت زي حسني ابن المعلم توفيق وفيهم اللي هيقع من