اسكريبت بقلم سلمي بسيوني

النهاردة كل واحدة اختارت فستانها وكل واحدة متحمسة لليوم والفرحة مالية قلب الكل لدرجة واحنا قاعدين سقفنا وزغرطنا وغنينا للعروسة وفرحناها والبيت كله سمع دوشتنا..
الدوشة الحلوة..
دوشة اللمة والفرح.
الكل نام والأنوار انطفت طلعت على سطح البيت مجهزينه القعده فيه تحفة الخيوط الطارة الآيس كوفي وصوت الست في الخلفية..
كله مظبوط قعدت وبدأت أكمل الطارة في الليلة الهادية دي.
_أي الروقان دا كله
حطيت إيدي على قلبي لما وصل لعندي هو وصوته.
_خضيتني يا خالد.
_أنت إلي قلبك خفيف بس.
شد كرسي وقعد 
_قاعدة بتعملي أي متأخر كدا.

خبيت الطارة بعيد عن عينه فبصلي بشك.
_أي سر حربي 
سكت وعيني متركزة عليه فكمل
_وريني ومش هقول لحد بجد.
قربت وطلعت الطارة إلي خلصت نصها تقريبا والنص التاني لسه مرسوم.
_واو !! أنت..عملتي التحفة دي!!
ابتسمت وأنا ببصلها
_هي متعبة أوي ومبحبش أشتغل طارات بس كله يهون عشان عيون رنا.
ابتسامتي اتمسحت ورفعت صباعي قدام وشه
_بس دي مفاجأة أوعى تعرف رنا أو يحيي.
_سرك في بير!
بصيتله بشك فكرر
_ما قلنا سرك في بير بقى أي شيفاني خالتك اللتاتة
_أنت متأكد إنك كنت عايش برا 
ضحكنا إحنا الإتنين.
_بحب مصر أوي هي صعبة ومرهقة أوي بس بحبها والحمدلله أني لقيت شغل كويس هنا عايز أكون هنا جنب عيلتي ضيعنا وقت كبير أوي بعيد عنهم بحاول أقنع أهلي وأخواتي بس لسه مش موافقين ينزلوا نهائي.
_الغربة بتقسي بردو بس للأسف هو دا الحل مش كل الناس هتكون محظوظة بشغل كويس هنا سيبهم على راحتهم هم شايفين إلي أنت مش شايفه وأنت شايف إلي هم مش هيشوفوه.
_ومين فينا الصح
_مش شرط يكون حد صح وحد غلط المهم كل واحد يكون مرتاح ومبسوط بإختياره يعني أنا في أول شغلي كان في ناس بتتريق عليا أنا برسم أفراح
_أنا عارف.
بصيتله بغرابة عرف منين
فبقيت بسمع تعليقات عجيبة هو مين إلي هيطلبك ترسيمي فرحه هو في حد هيرسم فرحه أنت يومين وهتزهقي هم كانوا شايفين حاجة أنا مش شيفاها وأنا شايفة إلي هم مش شايفينه ومازال على فكرة في منهم ناس لسه متأكدين إني بنت لاسعة معاها قرشين محيرينها مضيعاهم على اللوح.
ضحك وربع إيده ولص للسماء
_الغريب إن مهما عملتي مش هترضيهم فدول بنسيبهم يتكلموا ومبنتعبش نفسنا في نقاش معاهم.
_ دي حقيقة.
فضلنا نرغي ونضحك لحد ما الفجر أذن ومحسيناش بالوقت قمنا وإحنا الإتنين صلينا ونمنا وضحكتنا من هنا لهنا.
صحيت تاني يوم الكل فطر وجهز عشان ننزل نكمل شوبينج جيبنا باقي المفارش وعملنا بروڤة لفستان عروستي وجيبنا هيلز ليا تليق على فستاني الأحمر.
في نص اليوم كنت ھموت من العطش كنت لسه هشتري مياة لقيته قدامي
_أي دا أنت طلعت منين
_جبتيلك آيس كوفي وجيبتلهم حاجات ساقعة أكيد عطشتوا.
ناولني الآيس كوفي في إيدي وكمل
_قولت أرد جميل إمبارح.
_شكرا يا خالد.
طلعت رنا من المحل
_أنتوا فين يا خالد برن على يحيي بقالي كتير مش بيرد.
خبط راسه بلغبطة
_دا تليفونه معايا إحنا عند الترزي في بروڤة البدلة جنبكوا هنا أنتوا خلصتوا
_فاضل حاجات بسيطة وواقعين بصراحة.
طب خلاص هرجعله نخلص ونيجي ناخدكوا.
وفعلا معداش عشر دقايق كانوا عندنا أتغدينا وروحنا وإحنا مش قادرين نتحرك ارتاحت شوية وبليل البنات اتجمعت ننظم الحاجة عشان حاجة العروسة كلها هتتنقل بكرا ولما الكل نام طلعت الروف أكمل الطارة والحمد لله مصحاش المرة دي رغم أني كنت أتمنى قعدة لذيذة زي امبارح تاني.
أنجزت شوية في الطارة ونمت متأخر.
صحينا تاني يوم بنجهز للفطار لقيناه جاي من برا باين عليه المجهود.
لما قرب يحيي ندهله قبل ما يطلع
_أنت فين يا ابني بدور عليك من