شقتنا الجديدة

وحكيتله على كل حاجه حصلت من يوم ما سكنا في الشقة دي والحلم اللي شوفته وكمان اللي حصل من شويه قالي أكيد بيتهئلك منا عايش معاكي اهو مبتحصليش ليه الحاجات اللي بتحصلك دي قلتله دا اللي مش عارفه معناه وعلى فكرة الحاجات دي بتحصلي وانت مش موجود انما طول مانت في البيت مفيش ولا أي حاجه غريبة بتحصل فكر شويه وقالي مش عارف طب بصي تيجي نخرج نتعشى بره طيب ممكن يكون اللي انتي فيه دا بسبب الملل والخنقة قلتله بسرعة لا مش عايزه اخرج خليك بس جمبي ومتمشيش قالي حاضر هقوم بس وانتي قومي اعمليلنا اتنين ليمون ساقعين كدا من ايدك الحلوه ولا اقولك هغير هدومي واروح أعملهم أنا خليكي انتي مرتاحه غير هدومه وخرج من الأوضة وبعد شوية جي ومعاه اتنين ليمون شربناهم وقالي متقلقيش يا حبيبتي أنا بس مضغوط اليومين دول وأوعدك بعد ما يخلص الشهر دا هنشوف شقة تانية تكون قريبة من شقتكوا عشان لما اروح الشغل تروحي تقعدي مع مامتك أو تزوريها من وقت للتاني كلامه ريحني وفرحني طبعا وقالي كمان بس عشان خاطري متخضنيش خضة زي دي تاني انتي متعرفيش أنا جيت على اخري ازاي!
هزيت راسي بمعنى حاضر راح ابتسملي وباس على راسي وقالي هروح الحمام اتأخر جدا ناديت عليه مردش خفت عليه جدا وقمت بسرعه أطمن عليه لكن ملقيتوش في الحمام ولا في أي مكان في الشقة رجعت الأوضة تاني عشان ارن عليه لقيته بيرن عليا وبيقولي معلش يا حبيبتي مسمعتش الرنة بتاعتك خير فيه حاجه! قبل ما ارد عليه عيني جات على كبايتين الليمون لقيت واحده منهم فاضية والتانيه مليانة على آخرها ومش عارفة ليه قلتله لا يا حبيبي مفيش كنت بطمن عليك بس.
بعد اللي حصل دا واتكرر معايا للمرة التانية عرفت إن اللي معايا مش عاوزين أو مش عاوز جوزي يعرف حاجه من اللي بتحصل ومكنتش عارفة هل دا مجرد تخويف علشان نسيب الشقة ولا ممكن تكون حاجه تانيه أنا مش عارفاها لكن اللي حصل معايا بعد كدا أكدلي ان دا مش تخويف ولا حاجه لإني في يوم وانا برتب السرير وافرشه لقيت ورقة صفره محطوطة بعناية بين المرتبة والمفرش ورقة باهته والكلام اللي عليها مكتوب بخط الإيد وشكله مقارب لخط النسخ من جماله لكنه مكتوب بالإيد مش على الكمبيوتر.
الورقه ريحتها غريبة وأقرب ريحه ليها ممكن تكون ريحة القرنفل أما الكلام اللي مكتوب عليها مش مفهوم آه كنت عارفه اقراه لكن الجمل مكانتش راكبه على بعضها كنت متأكدة ان الورقة دي مكتوبه علشاني وان جوزي مهما حصل مكانش هيشوفها حتى لو كانت قدامه المهم حطيتها على جمب لحد ما اشوف حد بيفهم في الحاجات دي شيخ مثلا أو دجال حتى بس كانت نيتي طبعا إن جوزي ميعرفش لحد ما أشوف حل للمشكلة اللي انا فيها لإني اتأكدت ان محدش هيعرف يخرجني من المشكلة دي غيري حطيت الورقة جمب الأباجورة ورحت أفرش السرير وارتبه وأنا بالي مشغول بيها بعد ما خلصت وجيت اخدها عشان اشيلها لحد ما اشوف حكايتها لقيتها محطوطة في كوباية المياه ولما ركزت أكتر لقيتها بتتحلل جواها زي متكون قرص فوار وجزء كبير منها داب بالفعل في المياه اتلبخت ومعرفتش اشيلها ولا لا ولا مين اللي حطها في الكوباية انا متأكدة اني حطيتها بعيد عنها المهم قربت منها پخوف