منخفض ابو الغراديق... بقلم محمد ابراهيم

لكن المرعب إن إللي طلعله من عمق 30 متر مش الماسورة ... إللي طلعله في الحبل كان راس جدي !!.
سعيد إترعب وبحركة ماكنتش مدروسة منه كان هايقع من فوق .. لولا إنه مسك نفسه ورد فعله في أخر لحظة.
كنا عايشين في الوضع دا يومين .. وكل دقيقة تحصل حاجة لواحد فينا .
اليوم الأول عدى بموقف تاني حصلي شخصيا لما دخلت علشان أنام والساعة كانت بتقرب على الفجر .. ماهو مافيش شغل والحال واقف .. لما دخلت الكرفان ونمت .. لقيت واحد بيصحيني وبيقولي 
_ إيه إللي جابك هنا .. إنت ماتعرفش إنه مكاني .. أنا هنا من قبلك .. ولو مامشيتش من هنا هاحرقك!!! .
كنت بين النوم والصحيان .. مش مركز .. لما فوقت شوية مالقتش حد واقف .. وماحدش نايم في الكرفان غيري .
رجعت كملت نوم وياريتني ماعملت كدا .. لإني بمجرد ما حطيت دماغي على المخدة .. السرير أبو دورين إتهز بيا بقوة !!!!!
وشميت ريحة حريقة .. الريحة موجودة بس مافيش حريقة .. خرجت برة الكرفان .. وبمجرد ما خرجت .. بدأت أسمع صوت حد بيهمس ف ودني وبيقول إمشوا من هنا !.
أيوة نفس الجملة إللي سمعتها من عم حمدي ومن سيد بس المرادي كانت بصيغة الجمع !.
في اليوم التاني صحينا كلنا على حريقة .. حريقة كبيرة ماسكة في كل الكامب .. وبدون مقدمات كلنا صحينا ف نفس التوقيت .. ولما خرجنا لقينا الكرفانات كلها من برة عبارة عن فحم !.
حصل إمتى وإزاي ماحدش فينا حس ولا شم بريحة غريبة مش عارفين إزاي .
والأغرب في الموضوع إننا لما صحينا ف نفس الوقت لقينا الساعة 7 المغرب .
معنى كلامي دا إننا كلنا بدون إستثناء نمنا أكتر من 15 ساعة !! .
طب إزاي 
دا كان السؤال إللي شاغل بالنا .. من وقتها قررنا نمشي ومش هانكمل ف المهزلة دي أبدا .
وبالفعل مشينا لما العربيات جت .. وطلعت الشركة على علم بإللي بيحصل ف الموقع .. ورغم كدا .. ماحدش منهم حذرنا .. ف نهاية كلامي .. حابب أقول إن كل إللي أتأذوا مننا ذنبهم ف رقبة الشركة .
تمت .
العهدة على الراوي زي ما بيقولوا اللي بعتلي التجربة دي أعرفه شخصيا.. وبيقسم انها حقيقية طبعااا انا اضفت عليها بعض التفاصيل علشان تطلع بالشكل اللي حضراتكم قرأتوه..

ماتنسوش بقى اللايك والكومنت ❤️