قصة العجوز بقلم محمد ابراهيم

اللي عملته اني مسكت ايد معاذ وقومته بالعافية وخدناها جري .. مكنش قادر يجري وكل شوية يقع بس كنت بقومه .. مش عارف احنا بنجري فين كل اللي عملناه اننا جرينا وخلاص .
لما بعدنا ووقفنا ناخد نفسنا معاذ مكنش على طبيعته .. كان عمال يعيط بهيستريا .. الفجر أذن وعلشان أخليه يهدى قولتله يلا نتوضا ونصلي الفجر .
وبالفعل عملنا كدا .. وبعد الصلاة خرجنا من الجامع ومعاذ بدأ يبقى أهدى .. متكلمش معايا خالص .. روح بيته بعد ما اديتله الموبايل بتاعه .
حوالي أسبوع ماظهرش وكنت بطمن عليه من والدته .. لانه مكنش بيتكلم .. والدته قالتلي 
_ من اسبوع وهو على الحال ده .. مش عارفه حصله ايه .. ولا بيتكلم ولا حتى بياكل يا ابني .. وكله كوم وصرخاته بالليل كوم تاني .. متعرفش يا عاصم ايه اللي جراله .. قولي متخبيش عليا.
في الحقيقة مقولتلهاش على حاجة لاني أنا شخصيا معرفتش ايه اللي معاذ شافه يخلي لسانه يتعقد ويعمل زي ما والدته قالتلي .. ده خلاني أروحله البيت وأدخل أوضته وأتكلم معاه .
لما دخلتله لقيت دقنه طويلة على غير عادته وكان في ورق كتير مرمي في الاوضة بإهمال .. ورق مرسوم فيه شخص واحد بس .. العجوز !! .. معاذ غاوي رسم .. وكانت دي الطريقة الوحيدة اللي يعبر بيها على اللي جواه.
بدأت أفهم واتأكدت ان العجوز السبب .. ومن غير ما اعرف من معاذ اي حاجة .. عرفت من الرسومات اللي في الورق .
لانه كان راسم عربية بتخبط العجوز وهو على العجلة .. ورسمة تانية فيها العجوز مرمي على الكوبري والدم سايح من دماغه .. رسمة تالتة فيها العجوز بيخرج من المدرسة اللي في نهاية الكوبري واللي شوفته واقف على سورها .. رسمة رابعه فيها سواق العربية بيهرب بعد ما خبط العجوز وهو بيهرب دهس العجلة والعجوز تحت العجلات والعربية بتبعد رسومات عشوائية قارنتهم بصوت فرملة العربية اللي سمعته واتأكدت ان في حد داس العجوز وهو خارج من المدرسة وبعد ما اتخبط .. سواق العربية ماوقفش ونزل .. لا ده داس بنزين وداس على العجلة والعجوز وهرب !! .
وقتها بصيت لمعاذ لقيته باصصلي وبيبكي .. طبطبت على كتفه وقولتله 
_ الواضح انك شوفت بعينك تفاصيل الحاډثة علشان كدا انت مصډوم .. صدقني يا معاذ اللي عمل كدا ربنا مش هيسيبه أبدا .
بعد الموقف ده رحت وسألت على العجوز في المدرسة لقيته طلع بواب المدرسة وبالفعل ماټ في حاډثة بشعة.
ده الموقف اللي حصل معايا ومعتقدتش هشوف موقف أبشع منه في حياتي مرة تانية .. وأعتقد ان معاذ غير وجهة نظره عن العالم الأخر.
تمت.
لو وصلت لحد هنا يبقى قصة النهاردة خلصت.. من فضلكم متنسوش تدعموني بلايك وكومنت وشير