وعد الحلقة الثانية

طارق 
دالياااا انا مش فايقلك الله يكرمك ادخلي نامي وسيبيني في حالي 
داليا دخلت تدب في الأرض وهي متغاظة ودخلت على أوضة مليكة ونامت معاها مش وقتك خالص يا داليا والله 
في الليلة دي انا معرفتش انام مجاليش نوم من التفكير كل الروايات والأفلام البوليسية اللي شوفتها في حياتي ما اديتنيش تفسير للي بيحصل دا 
كل اللي قدرت اعمله اني اول ما روحت الشغل تاني يوم الصبح اديت الموبايل دا لواحد صاحبي في مباحث التليفونات قالي هجيبلك حكايته كلها النهارده بس على آخر النهار كدا 
كان قاعد معايه شريف صاحبي حكيتله الحكاية قعد يضحك عليا وقالي انا مش قادر اصدق ان طارق بوند يتسوح التسويحة دي دي واحدة عاملة فيك مقلب يا عم 
ازاي يا شريف دا شكل مقلب واحدة ايه دي اللي مخاوية عفاريت عشان تعرف تعمل كل دا 
يا عم اسمع مني هما النسوان بيغلبوا واحدة فاضية وبتتسلى عليك 
اسكت يا شريف تعرف تسكت انا غلطان اصلا اني باخد رأي واحد زيك 
فضلت طول النهار مستني تليفون صاحبي اللي في مباحث التليفونات علشان يجيبلي بيانات الشريحة اللي اتعمل منها المكالمة بتاعة الست وعد دي التليفون رن جريت عليه مكانش هو كانت ماما بتطمن عليا بعد السلامات والتحيات والذي منه ومراتك عاملة ايه وبنتك واحشاني لقيت نفسي فجأة بقولها بقولك ايه يا ماما هو مين اللي سماني طارق انتي وللا بابا 
ههههههههه انت خلصت القضية اللي كانت شاغلة البلد كلها وفضيت خلاص مبقاش وراك حاجة وقاعد بتفكر في قصة حياتك من أولها وللا تكونش اتشهرت وناوي تكتب مذكراتك 
ادينا بندردش يا ست الكل وحشتني الدردشة معاكي 
على ماما برضو شغل المباحث دا يا واد اذا كنت انت اتربيت على الروايات البوليسية متنساش ان انا اللي كنت بشتريهالك 
ههههههههه أبدا والله
يا ست الحبايب دا سؤال عادي 
على العموم انا اللي سميتك طارق لو مش عاجبك الاسم بقى احمد ربنا اني ما سيبتش ابوك هو اللي يسميك انت عارف ابوك متدروش وفاكر نفسه من أولياء الله الصالحين وأنا حامل فيك حلم اني خلفت ولد واول
ما نزل ركب على حصان ابيض وطار بيه في السما ولما خلفتك كان فاكر ان احلامه مبتنزلش الأرض وقالي شوفتي مش أنا أول واحد بشرك انك هتجيبي ولد اهو دا حلمي وكان عايز يسميك حلمي بس انا مرضيتش قولتله حلمي مين يا اخويا احنا هنسميه طارق ادعيلي بقى لولايا كان زمانك حلمي 
انتظروا الحلقة الثالثة