الجزء الثاني والاخير

هادية  
_ فلوسي .. مش هينفع اركب من غيرها .. انا تعبت فيهم ومش مستعد افرط فيهم بالسهولة دي .
بصيت حواليا وانا بقوله 
_ البحر جزء من المساحة السودة منضمنش لو غرقنا كلنا ايه اللي ممكن يحصل .. وانا مش مستعدة اجازف علشانك.. وزي ما انت شايف كدا .. مافيش غير المركب ده.. وده املنا الوحيد في خروجنا من هنا.. انا حتى معرفش المركب اللي كنت عليه راح فين ومش مهم عندي .. المهم اخرج من هنا بسلام.
فضل واقف شوية وهو بيبص للشوال والشنطة وكأنه بياخد قرار رجع يقولي بس المرادي كان باصص للبنت 
_ متعرفوش انا تعبت قد ايه وايه الظروف اللي مريت بيها علشان يبقى عندي الثروة دي كلها .. ومش هقول ومش مهم تعرفوا .. يا اركب بيهم يا اما مش همشي من هنا.
كنت عايزه اقاطع كلامه واقوله انه بالفعل قال كل حاجة غلط هو عملها بس اكتشفت ان الكلام بالفعل طلع بشكل لا ارادي مننا واللي خلاني اټصدم اني وصلت لفكرة اني طالما سمعته يبقى هو كمان عرف عني كل حاجة.
نزلت من على المركب ونزلت الشنطة من على كتفه واللي كانت مخليه ضهره مأتب وقولتله وانا بشاورله على الفضاء الاسود 
_ واضح ان المكان ده اللي بيدخله مبيخرجش .. لازم لما تجيلك فرصة تلحق نفسك من الڠرق تسيب اي حاجة انت متعلق بيها .. الفلوس لو راحت وانت موجود تقدر تجيبهم طول ما انت بخير وبصحتك .. ده اخر كلامي .. احنا ماشيين. 
وركبت وجيت علشان اقول لتامر يتحرك ... ملقتهوش!! .
مسكت المجاديف وبدأت ارجع لورا 
_ عندك حق .. استني انتي معاكي حق .. انا هسيب الفلوس .. وهركب معاكوا .. هجرب ولو مرة واحدة متعلقش بالفلوس واشوف ايه اللي ممكن يحصل .. يلا .
ضحكت ورمى بالفعل الفلوس وركب معانا وبدأت ارجع وادخل جوة الضباب الكثيف .
بمجرد ما دخلنا وانا حسيت بفقدان زمن غريب احساس مش عارفه اوصفه غير اني حسيت اني دخلت جوة متاهة .. دوامة لما فقت منها لقيتني في اوضة بيضا ونايمة على سرير وصوت اجهزة شغال من حواليا مستشفى .. انا في مستشفى !! .
فتحت عيني بالعافية سمعت صوت تامر بيقول 
_ سارة .. يا دكتور .. يا دكتور سارة فاقت .. الحمدلله يارب .. يا بركة سورة يس .. الحمدلله .. الحمدلله .
مكنتش قادرة اتحرك .. يا دوب ضحكت له ضحكة خفيفة وروحت في النوم مرة تانية بس المرادي لما فقت لقيت تامر جنبي وماسك ايدي وبيبوس على راسي وهو بيبكي وبيقولي 
_ انتي عارفه انك كنتي هتروحي مني في الحاډثة المشؤومة اللي حصلت .. مكنش عندي شك ان ربنا هيسمع