رواية بقلم ملك إبراهيم

نهاية كل أسبوع اخدهم واخرجهم ومبقتش اشغل تفكير هو بعت مصاريف البيت ولا اتأخر زي العاده لان ربنا كان بيكرمني الحمدلله وبيبعتلي رزقي ورزق ولادي 
مكنتش اعرف ان طول الفترة اللي فاتت دي ربنا قطع رزقي ورزق ولادي من عنده سبحان الله هو استخسر رزقنا وكان بيضغط عليا وبيهددني انه هيمنع الرزق ده عننا بس ارادت ربنا سبحان وتعالي انه يبعتلي رزقي ورزق ولادي عن طريق شغلي اللي مكنتش عمري افكر او احلم اني اعمله وفي نفس الوقت يمنع الرزق ده عنه وشغله يقف تماما 
هو دلوقتي شغله وقف ومراته التانيه زهقت وكل يوم خناق هما الاتنين مع بعض بسبب الفلوس ومصاريف بيتها اللي هو مبقاش قادر يكفيها وسط غلاء الأسعار الحالية وهي مبقتش طايقه تعيش معاه على الوضع ده وطلبت منه الطلاق 

مامته واخته طبعا عرفوا بمشروعي اللي انا فتحته في محل صغير قريب من البيت كل الناس كانوا مستغربين انا ازاي قدرت افتح مشروع زي ده وكمان بقى ليا اسم معروف وماشاء الله طول اليوم بيطلع من عندي اوردرات للمنازل والافراح واعياد الميلاد انا نفسي كنت بستغرب كرم ربنا عليا وكنت دايما اشكر ربنا في دعائي وفي كل صلاة حقيقي الارزاق بيد الله واحده ومفيش بشړ بيرزق بشړ زيه اللهم لك
الحمد والشكر كما ينبغي لجلال وجهك وعظيم سلطانك 
في يوم وانا قاعده مع ولادي في الشقة بالليل لقيت حماتي واخت جوزي جاين يشوفونا وطبعا الزيارة كان ليها هدف كانوا مستغربين شكلي اللي اتغير وبقى احلى وحالتي النفسيه اللي بقت احسن كتير بعد ما اهتميت بصحتي وربنا كرمني وارتحت من هم ابنهم وطلباته وخناقاته علي اقل شئ 
اخته حكتلي علي المشاكل اللي بينه وبين مراته التانيه وانا حقيقي مكنتش مهتمه خالص لان كان بقالي فترة بفكر في الطلاق منه لاني حاليا مش محتاجة حتى يكون اسمي مرتبط باسمه انا دلوقتي بقيت قوية كفايه اني اقدر اواجه الحياة والناس لوحدي وكمان ايماني وثقتي بالله بقوا أقوى كتير بعد ما اتأكدت بنفسي ان ربنا كرمه كبير ومش بيرضى بالظلم ومش بيوقف رزق حد علي حد 
مامته قالتلي انه هيطلق مراته التانيه وعايز يرجع لبيته هنا وسط ولاده وطلبت مني اسامح وانسى كل اللي حصل ونبدأ صفحة جديدة عشان خاطر الولاد ميتحرموش من ابوهم ! للأسف ده كان رأي اهلي هما كمان لان كل اللي يهمهم ان بنتهم تكون عايشه مستقره مع جوزها وولادها ومش مهم اي حاجة تانيه وطبعا كلمة بابا المعتادة انا عايز اموت وانا مطمن عليكي انك في حماية راجل
بس انا دلوقتي بقيت متأكده ان الراجل مش هو الحماية بالعكس الراجل هو الخۏف وعدم الشعور بالأمان راجل في حياتي يعني هفضل طول الوقت خاېفه انه يسبني او يتجوز عليا او يمنع عني مصاريف البيت ويرميني في الشارع راجل يعني هفضل طول الوقت شايله هم وخوف جوايا 
استغربت انهم في كل الحالات بيطلبوا ان انا اللي اتنازل واضحي عشان خاطر الاولاد!! يعني لما كان هو الاقوي وانا الاضعف كلهم كانوا معاه وطلبوا مني استحمل واضحي عشان خاطر الاولاد والنهاردة بقيت انا الاقوى وهو الاضعف ولسه برضه بيطلبوا مني استحمل واضحي عشان خاطر الاولاد 
طب خلونا نطلع الاولاد من الموضوع كله لان الولاد عاشوا اكتر من سنه وباباهم عايش في بيته التاني بعيد عنهم والحمدلله قدرت اكون الاب والام في نفس الوقت ونجحت في ده 
ايه دلوقتي اللي يخليني اسامح وارجع
اعيش معاه تاني هتقولوا يمكن لسه بتحبيه واللي يحب بيسامح هقول انا اه كنت بحبه بس دلوقتي خلاص مبقتش احبه ولا اكره! موجود زي مش موجود مش هستحمل ان يجمعنا بيت واحد تاني وارجع اشيل مسؤوليته واشغل نفسي بهمه ومشاكله انا مرتاحة كده وحقيقي مبقاش يشغلني اي حاجة تخصه 
مش هقول انا محتارة في قراري لاني تقريبا واخده القرار يمكن بس محتاجة اعرف رأيكم من وجهة نظركم ولو حد مر بالظروف اللي مريت بيها يمكن يفيدني 
وحاجة اخيرة عايزة اقولها رزقنا مش واقف علي حد والست مش ضعيفه ومش محتاجه لراجل يكون حماية وسند زي ما بيحاولوا يقنعونا لو في امر واقع ھيأذيكي نفسيا لازم ترفضيه ولو معندكيش القدرة والقوة انك ترفضيه استحملي فترة مؤقته وقربي من ربنا علي قد ما تقدري في صلاة وصوم وقيام الليل والاذكار والدعاء في كل وقت وفي كل صلاة صدقيني بعد فترة قليلة جدا حياتك هتتغير وربنا هيقويكي ويفتحلك ابواب رزق مكنتيش تعرفي عنها حاجة 
اللهم لك الحمد والشكر يارب العالمين