نواضر الحلقة الخمسة و السادسة

طغمار هز راسه اه فعلا وعشان كده احنا في العشيرة عارفين اللعبة دي وعلاجها والوحيد اللي يعرف يبطل الأثر هو حكيم العشيرة برقان.. 
ولولا أمر مولانا المارد الأسود مكنتش حضرت ولا اتدخلت للإنس.. 
الجنية التانية لسه پتكره الانس ياطبيب.. 
طغمار مش مسألة كره ولا حب أنا بس محبش أتعامل في شيء يخصهم من قديم الأزل لولا حكم المارد الأسود علينا وحبه للإنسية مغازل وضعفه قدام بنته نواضر غير كده مكنتش حضرت. 
ضحكت الجنية يعني بتعترف أنك پتخاف من المارد الأسود 
طغمار اللي يقولك مبخفش منه يبقى كداب 
ثانيا أنا مش عارف ليه قلبي ارتاح لاتنين دول.. الراجل الانسي ده ومراته فيهم حاجه غريبة كده 
بصت له الجنية ده حقيقي حتى وهم نايمين متخدرين كده قدامنا تحس فيهم طيبة ورضا بالمقسوم مش غريبة بقى أنه بنت المارد الأسود تتعلق بيهم وترد لهم الجميل. 
طغمار لسه محدش عارف هل الأثر تم ابطاله وهيخلفوا ولا لأ أنا عملت لهم العملية ونضفت على أد ما قدرت ده بقى هيبان الأيام اللي جايه.. 
يلا بينا دلوقتي الفجر خلاص على وشك ومينفعش نفضل هنا لحظة تانيه.. 
خرج طغمار واللي معاه واختفوا زي ما ظهروا.. 
بس الأكيد أني الوحيدة اللي عرفت السر.. 
نمت وأنا فرحانة وبدعي ربنا يستجيب مني ويرزق أبويا مجاهد وأمي نعمة بذرية من صلبهم.. 
تاني يوم أبويا وأمي اتأخروا في الصحيان من النوم مش زي عادتهم  دول كانوا بيقوموا مع آذان الفجر.. 
أبويا قام من النوم حاسس بۏجع في ضهره.. 
أمي صحيت وهى حاسه بتعب شديد في الرحم.. 
سمعتها بتقوله مجاهد أني مش قادرة يا أخويا جسمي مش شايلني وشوفت منام غريب.. 
أبويا قال ومين سمعك أنا حيلي مهدود وضهري شادد عليه معرفش ليه!! 
بس خير قولي شوفتي ايه يانعمة! 
بصت له پخوف وقلق 
شوفت زي ما يكون ليلة امبارح حد واقف زي ما يكون دكتور وبيعمل لنا عمليات.. 
أبويا ضحك ايه يا وليه أنتي بتخرفي!! 
أمي لا وحياة الختمة الشريفة يا أخويا ما بخرف أنا شوفت المنام الغريب دهوت وجتتي تعباني.. 
أبويا سكت واستغرب وأنا كمان جتتي ۏجعاني ضهري يا بت يانعمة مش قادر أتحرك.. 
سلامتك يا اخويا ريح النهارده بلاش تروح الغيط وابعت للواد طلبه ابن أخوك يبعت لك كام نفر يشيلوا الشغل لحد ما تروق.. 
بص لها قال يعني أنتي اللي رايقه ما أنتي راقده أهو ياوليه.. 
يبقى كده هخلي الواد طلبه يفوت على البت نبوية تيجي تشيل شغل الدار يومين.. 
أمي اه والله ياريت أهي تسترزق بردو دي بت غلبانه وشقيانه على عيالها بعد ما جوزها ما سابها وطفش.. 
أبويا خلاص أنا هقوم كده أتسند لحد باب الدار أقف وأشيع أي حد معدي لبيت أخويا.. 
وابقي اعملي حسابك في شوية طحين وشوية رز وسمن وجبنة وحبة لبن اديهم لنبوية لما تيجي تمشي ولو طبختم خليها تزود في الطبيخ والزفر وتعملي حسابها هى وعيالها.. 
أمي حاضر يا اخويا روح اللهي يطعمك ما يحرمك ويراضيك أنا كنت هقولك كده بس أنت دايما سابقني يا أبو كف كريم.. 
سمعت كلامهم ده ودعيت من قلبي. 
يارب أنا عارفه أنك سامعني ومجيب الدعوات يارب راضيهم بالذرية يارب 
ساعة ولقيت نبوية جاية.. واحدة غلبانة وشقيانة هدومها فيها من كل رقعة لون.. 
هتقولوا عمياء وبتشوفي ازاي مش قولنا أنا نصي انسي ونصي جني بشوف بنصي الجني ياجماعة..