عرايس هند بقلم ياسر عودة الجزء الاول 

عرايس هند الجزء الاول 
القصه من وحى خيال المؤلف
بقلم ياسر عوده
 . كلنا عارفين ان اللي بېموت ما بيرجعش بس قصيتي مختلفه علشان اللي ماټو رجعوا تاني ومعاهم كل ذكرياتهم ومش بس كده دول راجعين يحاسبوني على اللي عملته زمان.
علشان تفهموا القصه وقبل كل حاجه حابب اعرفكم بنفسي انا المهندس احمد الصاوي مهندس الكترونيات السن 40 سنه متجوزتش وعندي بنت وحده اسمها هند واللى عندها 10 سنين طبعا لازم تسألوا ازاى متجوزتش وعندك بنت علشان تفهموا ده لازم تسمعوا قصتي للنهايه .

الحكايه بدات من كام شهر كنت عايش انا وبنتي هند في بيت لوحدنا البيت عباره عن دورين وجنينه كبيره حالتنا الماديه كويسه جدا والحمد لله وكنا عايشين في سعاده لغايه ما ابتديت تصرفات هند تتغير كل يوم عن التانى .
هند بطبيعتها طفله هاديه انطوائيه ما بتعرفش تصاحب حد ويمكن اكون انا صادقها الوحيد حتى فى المدرسه هند مش مصاحبه اى حد ومش بس كده لو حاولت اى زميله ليها فى المدرسه تصاحبها هند بتبعد وتتجنبها ولو اتكلمنا على تسليتها الوحيده فهى اللعب مع عرايسها الكتير فى اوضتها ممكن هند تقعد طول اليوم فى اوضتها تتكلم مع عرايسها ومش بس بتتكلم معاهم هى بتقول ان هما بيردو عليها كمان وخصوصا عروستين بتلعب معاهم ومسمياهم وانا مكنتش واخد بالى من اللى هى بتعمله لغايه لما بالصدفه عرفت ده .
ومكنتش اعرف العروستين اللى هى بتتكلم معاهم لانى ببساطه انا مشترتهمش ليها ومعرفش هى جبتهم منين اصلا وفي يوم بعد ما خلصت شغلي في المكتب بتاعي طلعت للدور التاني عشان اطمئن على هند في اوضتها كانت الساعه حوالي 12 نص الليل وكنت متوقع ان انا لما اطلع الاقي هند نايمه بس لما قربت من اوضتها سمعت صوت هند وهي بتكلم مع حد فاستغربت وقربت من الاوضه وفتحت الباب بهدوء ولقيت هند قاعده وقدامها عروستين وعماله تتكلم معاهم وبتقول لهم 
عارف يا صبري انا اكتر حاجه بخاف منها في الدنيا دي كلها ايه الكلب اللي مربيه عمو جميل اللي ساكن في البيت اللي قصادنا اصل عمو جميل بيسيب باب الجنينه مفتوح ولما بكون جايه من المدرسه الكلب بتاعه اللي اسمه ريكس دايما بيخوفني بصوته المرعب ومره زمان كان سايب الباب مفتوح والكلب مكنش مربوط وانا كنت راجعه من المدرسه ولما عديت من قدام باب الجنينه بتاع عمو جميل ساعتها الكلب بتاعه شفنى وجرى ورايا انا ساعتها جريت وكنت پصرخ وخاېفه اوى منه هو كان هيعضنى بس انا لحقت دخلت بتنا وقفلت الباب وانا پصرخ ولما بابا سمعنى جه وزعق مع عمو جميل