اسكريبتات بقلم هاجر نور الدين رقم 1
انت في الصفحة 1 من 7 صفحات
جواز صالونات
_ بس أنا مش عايزة أتجوز صالونات يا رحمة
كنت بكلم أختي الكبيرة وهي بتحاول تقنعني بالعريس اللي جاي يتقدملي ردت هي عليا وقالت بتساؤل
أومال عايزة تتجوزي إزاي تمشي مع واحد شوية ويسيبك ويوجع قلبك وتتحسب عليك تجربة وإرتباط وحب!
بصيتلها وقولت بإعتراض على لهجتها
_ متتكلميش كدا معايا يا رحمة وبعدين أكيد مقصدش كدا أنا أقصد حتى حد أبقى عرفاه ومرتاحاله مش شرط أبقى إرتبطت بيه أبقى عارفة شخصيته وطباعه لكن أتجوز حد معرفهوش خالص إزاي بس يا ناس!
يا ندى يا حبيبتي إنت ولا بتشتغلي ولا بتنزلي في حتة عشان يجيلك شخص تبقي عارفاه كويس يبقى هتعرفيه إزاي من غيؤ ما ييجي ويقعد معاك مرة في التانية في التالتة لحد ميعاد الخطوبة والخطوبة دي اللي هي بتبقى فترة التعارف أصلا وفيها بتقرري يإما مناسب ليك يا إما لأ لكن كلامك ونظرتك للموضوع بيأكدلي إنك متسممة من كلام صحابك البنات عن جواز الصالونات اللي محدش فيهم جربه أصلا!
_ مالهوش علاقة بصحابي وغيرهم أنا اللي بقولك إن الموضوع كله أصلا مش صح ومش داخل دماغي
ضحكت بسخرية وبعدين قالت بهدوء من تاني
مش صح!
الحاجة الوحيدة الصح في كل العلاقات اللي بقينا نشوفها مش صح! لأ يا ندى إنت كدا بجد دماغك مغسولة طب ما أنا متجوزة من عمر أهو وأنا وهو بنحب بعض جدا وأديك شايفانا مبسوطين إزاي مع بعض برغم إن جوازنا كان صالونات الموضوع مش صالونات ولا غيرها يا ندى صالونات إرتباط ماشيين مع بعض بيحبوا بعض بيتواعدوا كلها مسميات يا ندى وكلها طرق لبدأ التعارف والزواج ولكن مستخيل تعرفي إذا كانوا جد وهيكملوا ولا لأ غير الصالونات عشان كدا الصالونات هو الوحيد الصح فيهم الصالونات دا مسمى ولكن هو برضوا طريق لفتح المجال للتتعارف وللحب والزواج ولكنه طريق صحيح قدام أهلك وقدام العالم كله مفيش حاجة ېخاف منها ولا يخبيها سيبك من مسمى الصالونات طب ما لو بتشتغلي وواحد معاك في الشغل عايزك بجد وشاريكي هييجيلك البيت وهيطلب إيدك من أهلك على طول ومش هتبقي عارفاه غير شكلا بس الصالونات يا ندى مش وحش ولا بعبع زي ما بتسمعي أنا عمر أول ما قابلته وهو قاعد برا لقيت فيه كل اللي بحلم بيه يا ندى الشخص اللي كنت بتمناه بجد عارفة زي إتخطفت كدا من أول نظرة ومع الوقت إتأكدت إني عمري ما هلاقي زيه
_ أيوا بس يا رحمة لو مطلعش الشخص المناسب ليا هتتحسب عليا خطوبة وخلاص!
جاوبتني بإبتسامة كإنها بتقنع طفلة وقالت
وإي اللي فيها يعني طب ما أنا كنت مخطوبة قبل عمر ل حسن ومطلعش الشخص المناسب وسيبته لإنها ببساطة فترة تعارف ولكن في العلن الكل عارف عنها زيها زي الإرتباط على فكرة بس دي مفيش حاجة تخافي منها ولا تخبيها
وعلى فكرة مستحيل في كل اللي هيتقدمولك مش هتلاقي حد مناسب لإن أكيد فيهم نصيبك والنصيب بيصيب مهما كان مين أو فين أو إمتى
